"Badatoz Txurrukako Konbibentziak! Txurrumuskiko begirale eta lagunekin asteburu zoragarri bat izan nahi duzu?" deia egin du Txurrumuski Aisialdi Taldeak bere sare sozialen bidez. Izan ere, urtero bezala, Txurruka aterpetxean egonaldia antolatu dute. Martxoaren 8tik 10era izango da, eta LH3tik LH6rako bitarteko haurrek izango dute horietan parte hartzeko aukera. Txurrumuskiko kideek azaldu dutenez, hiru egun horietan hainbat jarduera eta jolas egingo dituzte haurrek asteburu ederra igaro dezaten.
Epeei dagokienez, izena emateko epea atzo ireki zuen Txurrumuskik eta otsailaren 5ean itxiko dute. Horretarako, internet bidez eskuragarri jarri duten galdetegia bete behar da. Izen-ematea banaka, bikoteka edo hirukoteka egin daiteke, eta behin bakarrik apuntatu daiteke. Egonaldietan eskaintzen den toki kopurua baino izen-emate gehiago jasotzen badituzte, berriz, otsailaren 6an egingo dute zozketa, eta tokia dutenei mezu bidez jakinaraziko zaie zein urrats jarraitu behar dituzten hortik aurrera.