Karkara Orioko eta Aiako orainkaria - Albisteak

Enpresa ideia berritzaileak sarituko ditu Udal Elkarteak

Karkara — 2010-03-10T13:30:47Z

Apirilaren 16a baino lehen aurkeztu beharko dira lanak

Enpresa ideien Urola Kostan Ekin! 3. lehiaketa abiarazi berri du Urola Kostako Udal Elkarteak, enpresa espiritua sustatu eta langile, enpresa eta enpresaburuen egokitze gaitasuna hobetzeko helburuarekin.

Bi ataletan banatu da lehiaketa eta beti ere enpresa-ideia berritzaile eta originalenak sarituko dituzte antolatzaileek: alde batetik, sortzear dauden edo 2009ko urtarrilaren 1etik aurrera sortutako enpresek aurkeztutako ideiak aztertuko dituzte. 3 sari banatuko dira sail honetan: 1.500 euro aurrenekoarentzat, 1.000 euro bigarrenarentzat eta 500 euro hirugarrenarentzat; bestalde, eskualdeko ikastetxeetako ikasleen ideiak ere sarituko dituzte. Diploma eta garaikurraz gain, netbook bana jasoko du irabazten duen taldeko kide bakoitzak. 2. geratzen diren taldekideek, berriz, garaikurra eta diplomaz gain, kultura eta teknologia berrietan gastatzeko 150 euroko bono bana hartuko dituzte.

Aurkeztu nahi dutenek

Interesatuek apirilaren 16a baino lehen aurkeztu beharko dituzte lanak, Urola Kostako Udal Elkarteko harreran: Urdaneta bidea 6, Zarautz.

Bestalde, informazio gehiago jaso nahi duenak Udal Elkartearen egoitzara agertu edo 943 89 08 08 –Eli– telefono zenbakira deitu beharko du.

Oinarriak jaisteko klikatu hemen.

Lizarralde txapeldunorde erremontean

Karkara — 2010-03-09T13:46:07Z

40-38 galdu zuen finala, 34-38 aurretik joan eta gero

Euskal Herriko Erremonte Txapelketako txapeldunordea da pasa den asteburuaz geroztik Asier Lizarralde oriotarra. Antiguoko Jaime Juanmartiñena izan du bikote txapelketa honetan ere eta Orioren izenean jokatu dute biek. Aurkari, berriz, Josetxo Ezkurrak eta Andoni Saldiasek osatutako Doneztebeko bikotea izan zuten martxoaren 7an, Markinako pilotalekuan jokatutako azken lehian. Kontrarioek gertutik jarraitzen bazituzten ere, partida osoan aurretik joan ziren Lizarralde eta Juanmartiñena (2 tantoren faltan 4ko aldea zuen Orioko taldeak:34-38), baina 40-38 galdu zuten azkenean.

Lortutako emaitzarekin gustura dago Lizarralde, baina ez, aldiz, Pilota Federazioarekin: ordura arteko partida guztiak Galarretako frontoian jokatu genituen; entrenamenduak egiten ditugun lekuan, alegia. Erremontean asko antzematen da hori, jokoan asko laguntzen baitu pilotalekua ezagutzeak; bai jokalariari berari eta baita ikusleari ere. Partidu hobea izaten da, azken finean. Gure kasuan, ordea, Markinan jokatu genuen finala, zesta puntako frontoi batean. Hala ere, aitortzen dut aurkariek ere ez zutela pilotaleku hori ezagutzen eta bi bikoteok egoera berean geundela.

Urtarriletik

Urtarrilarekin hasi zuen Euskal Herriko txapelketa Lizarraldek. Bi multzotan banatutako 11 bikote aritu dira orduz geroztik, indarrak neurtzen. Multzoko bigarren postuan bukatu zuen Orioko taldeak aurreneko txanpa; finalean izandako aurkari berak sailkatu ziren aurretik.

Finalerdietan beste multzoko aurrenekoen kontra aritu behar izan zuten eta 40-38 irabazita, azken partidarako txartela lortu zuten Lizarraldek eta Juanmartiñenak.

Emakumeen eskubideen aldeko elkarretaratzea egin zen atzo

Karkara — 2010-03-09T11:08:27Z

Ostegunean Zarautzen izango da Mundu Martxako furgoneta

Atzo, martxoaren 8an, Saltxerek deituta, Emakumeen eskubideen alde beti martxan lelopean elkarretaratzea egin zuen herritar talde baten Emakumeen Nazioarteko Eguna zela eta. Elkarretaratzearen bukaeran, martxoaren 13ra arte, Mundu Martxako furgoneta Euskal Herriko hainbat txokotatik pasatzen dabilela gogorarazi zuten Saltxerek eta 11n, ostegunean, Zarautzen izango dela. Martxoaren 13an, Iruñean bukatuko du furgoneta horrek Euskal Herriko ibilbidea eta autobusa antolatuko da Urola Kostako herrietatik hara joateko azken ekitaldian parte hartzera.

Uda garairako 12 langile behar ditu Udalak

Karkara — 2010-03-09T11:10:39Z

Martxoaren 31 baino lehen aurkeztu behar dira eskaerak

Urtero bezala, uda garairako langileak behar ditu Orioko Udalak eta lanpostu horiek betetzeko deialdia egin berri du. 12 langileentzako lekua izango du aurten: 4 izango dira kanpineko zaindari; 3 kanpineko komunen garbitzaile; 2 Antilla hondartzako kabinen garbitzaile; eta 3 udaltzain laguntzaile. Lan-zuzenbideko erregimenean egingo zaizkie guztiei denboraldi baterako kontratuak.

Deialdian parte hartu ahal izateko derrigorrezko bi baldintza bete behar dira: oriotarra izatea –udaltzain laguntzaileen kasuan izan ezik– eta langabezian egotea.

Izena-ematea

Martxoaren 31 baino lehen aurkeztu beharko dira eskaerak udal bulegoetan, bertan emango den instantzia betez: astelehenetik ostiralera, 08:30etik 14:30era.

Lanpostuak betetzeko probak, berriz, apirilaren 17an egingo dira Orioko kultur etxean, 09:00etan hasita.

Maria Luisa Irizar omendu dute gaur Lardizabal eskolan

Karkara — 2010-03-09T11:14:31Z

Ikasleek galdera asko egin dizkiote eta berak gustura erantzun

Gaur goizean, martxoaren 8an, Aian bizi den Maria Luisa Irizar korrikalari ohi andoaindarra omendu dute Lardizabal eskolan, Emakumeen Nazioarteko Eguna dela eta.

Lehenengo, orain dela urte batzuk Andoni Aizpuruak ETB1ean egindako erreportaje bat ikusi dute, gero, ikasleek bertso batzuk abestu dizkiote eta, jarraian, galderak egin dizkiote. Denetarik hitz egin du Maria Luisak: korrika hasi zeneko pasarteak, Olinpiar jokoetara joan ezin izan zuenekoa, beste korrikalariekin nola moldatzen zen… eta jakin-min handia erakutsi dute ikasleek.

Bukatzeko, ondorengo bertso hau abestu dute denek elkarrekin eta txapela oparitu diote oroigarri gisa:

Elurrez martxoak zortzi,

Emakumeon pizgarri,

Maria Luisa gaurkoan

zer dakarkiguzu berri.

Etxekoak zaindu zabiltza

zabiltza buru belarri

ez dakiu zein den sekretua

ezpainetan beti irri.

Laisterka azkarra ziñan

baita lau ume ekarri,

lore sortekin etxera

joana ziñan zu sarri.

Lardizabalgo eskolan

zu zera gure pozgarri,

merezitako txapela

guk nahi genizun ezarri.

Korrikalari bikaina

Gipuzkoak eman duen iraupeneko emakumezko korrikalari onenetakoa izan da Maria Luisa Irizar. Espainiako txapeldun izan zen zortzi aldiz: maratoian (1987, 1988, 1991 eta 1995); 10.000 metrotan (1987, 1989) eta 20 kilometrotan (1985 eta 1987). Beste zazpi aldiz irabazi zuen Behobia-Donostia lasterketa; eta Euskadiko kros txapelduna izan da lau aldiz (1982, 1989, 1990 eta 1991).

Olinpiar jokoetan ez du parte hartzerik izan. Maratoian Espainiako txapeldun izan arren, Espainiako Federazioak ez zuen 1988ko Seulgo jokoetara eraman, horretarako aurrekonturik ez zuela argudiatuz. Bartzelonako 1992ko Joko Olinpikoetan, berriz, pneumonia izan zen parte hartu ezin izanaren errudun.

Ainguraren muturra bakarrik bete zen txanponez

Karkara — 2010-03-08T15:22:21Z

Zozketako sariak kultur etxean jaso behar dira, astebeteko epean

Larunbatean, martxoaren 6an, aurreko asteburuan egitekotan zen Haitiren aldeko Elkartasun Eguna egin zen. Eguraldia lagun, 10:00etatik aurrera martxa onean hasi zen aingura txanponez betetzen, lagun mordoa bildu baitzen Toki-Alai elkarteak emandako hamaiketakora eta Heldu!-koen herri-kirol erakustaldira. Arratsaldean, berriz, ez zen herritar asko hurbildu txanponak jartzera. Txurrumuskikoek ume batzuen aurpegiak margotu zituzten, baina ez zitzaien jolasak egiteko adina haur inguratu. Arkupekoek txokolate beroa ere banatu zuten.

Iluntzeko zortzietan bukatu zen diru eta janari bilketa eta, orduan bai, jende dezente agertu zen, zenbat bildu zen jakin nahi zuten, baita zozketan zorterik izan ote zuten ere. Antolatzaileen esanetan, 5.000 inguru euro bildu zen –behin betiko datua Prosegur enpresakoek dirua zenbatutakoan emango dute– eta, aingura betetzetik urruti ibili baziren ere, eskerrak eman zizkieten ekitaldian parte hartu zuten guztiei, janaria biltzeko mahaian ere hainbat kaxa bete baitzituzten. Bukatzeko, zozketa egin zuten.

Zenbaki sarituak

Iosu Esnaolaren Realeko kamiseta, taldeko jokalari guztiek sinatuta: 1297.

Orioko Arraunketa Elkarteko kamiseta: 0356.

Orioko Arraunketa Elkarteko jertsea: 1203.

Itziar Kirolak dendan arropa erosteko 100€-ko txartela: 1078.

Aus_Art diskoetxearen 5 disko: 1502.

Argiñe dendan arropa erosteko 30€-ko txartela: 0169; 1035; 1110.

Txintxarri dendan arropa erosteko 30€-ko txartela: 1256: 1120.

Islada estetika zentroko solarium-saio 10 txartela: 1057.

Zozketan sariren bat irabazteko zortea izan zutenek kultur etxean jaso beharko dute, astebeteko epean, martxoaren 15 izango delarik horretarako azken eguna. Egun horretatik aurrera, 1049, 0112, 1185, 1513 eta 1517 ordezko txartelen jabeek kultur etxera bertaratu eta geratzen diren sarien artean aukeratu beharko dute.

51 oriotar eta aiar Lilatonen

Karkara — 2010-03-08T09:08:53Z

Amilibiak ezin izan du aurten txapela jantzi

Inoiz baino parte hartze handiagoa izan zuen atzo Donostiako kaleetatik barrena ibili zen 21. Lilaton lasterketak. 1.300 korrikalari izan ziren iaz eta 1.694 aurten. Emakumezkoaren Nazioarteko Egunaren, martxoaren 8aren, inguruan egiten da urtero-urtero, aldarrikapen modura, eta Orioko eta Aiako emakumeek ere ez zuten hutsik egin, ibilbideko 5 kilometroak egiteko prest azaldu baitziren guztiak.

Azken urteotan lasterketako txapela jantzi duen Nerea Amilibia aiarrak ezin izan zuen oraingoan garaipena lortu eta hirugarren izan zen, Iratxe Aranburu zarauztarraren eta Ana Royoren atzetik. Hala ere, iazko denbora hobetu zuen Nereak, 18 minutu eta 58 segundo behar izan baitzituen (irabazlea baino 12 segundo gehiago) lasterketa bukatzeko –19 minutu eta 16 segundotan gelditu zuen kronoa 2009an– . Gustura egoteko moduan da aiarra, parte hartu duen adina aldiz igo baita podiumera (lehen postuko koskan jarri da beti orain arte).

Jarraian Orioko eta Aiako korrikalarien sailkapen postuak dituzue:

3.	Nerea Amilibia Arruti	18:58
20.	Maite Uranga Azkue	21:36
97.	Idoia Olasagasti Eizagirre	24:46
98.	Ane Arruti Amilibia	24:49
241.	Ainhoa Albizu Elizalde	27:14
242.	Itziar Irastorza Cipitria	27:14
251.	Joana Domingo Ondozabal	27:19
253.	Noemi Domingo Ondozabal	27:20
278.	Ana Rosa Egibar Etxeberria	27:35
301.	Mikal Etxeberria Esnal	27:24
304.	Arantxa Manterola Lertxundi	27:48
333.	Mariajesus Indo Larrañaga	28:01
393.	Monika Igartua Telleria	28:29
395.	Lurdes Salsamendi Goñi	28:29
423.	Mariajesus Lertxundi Irure	28:19
426.	Mirari Arriola Irizar	28:46
427.	Olatz Mujika Etxeberria	28:46
462.	Eder Etxeberria Korta	29:10
478.	Ainhoa Ubegun Manterola	29:18
497.	Idoia San Sebastian	29:29
498.	Mariajesus Ibirriaga Lertxundi	29:29
502.	Itziar Olasagasti San Sebastian	29:32
545.	Leire Alustiza Lertxundi	29:47
619.	Ainhoa Pozo Lizaso	30:12
779.	Naiara Peinado Jimenez	31:26
780.	Nerea Arriaga Azkue	31:27
878.	Guadalupe Alvarez Juarez	32:03
899.	Eneritz Odriozola Irastorza	32:10
900.	Garbiñe Manterola Agirrezabalaga	32:10
973.	Begoña Aranegi Rementeria	32:38
1002.	Elena Azkue	32:45
1012.	Alazne Azpiroz Unsain	32:51
1090.	Aroa Iribar Iñarra	33:08
1092.	Eneritz Erkizia Zabala	33:08
1112.	Itziar Santa Cruz Arruti	33:11
1114.	Olatz Mujika Sarabia	33:12
1123.	Bitoria Agirrebeña Gereka	33:17
1125.	Cristina Agirrebeña Gereka	33:17
1157.	Lesly Herrera Espinoza	33:24
1158.	Arlen Diaz Arroyo	33:24
1272.	Maribi Urretabizkaia Udabe	34:00
1309.	Alazne Arrillaga Makazaga	34:17
1325.	Jasone Solaberrieta Etxeberria	34:21
1411.	Jaione Arrillaga Makatzaga	35:00
1509.	Aurelie Louineau	35:20
1559.	Olatz Olariaga Sarasola	35:52
1560.	Ainara Peña Illarramendi	35:53
1561.	Eider Salegi Arruti	35:53
1670.	Olatz Aizpurua Segurola	38:34
1671.	Izaskun Manterola Arruti	38:34
1691.	Gema Olasagarre Camio	42:09

Batelak eta aulki mugikorra asteburuan

Karkara — 2010-03-05T08:54:41Z

Trintxerpen izango dira batelak larunbatean; aulki mugikorreko ontziek Orion jokatuko dute, igandean

Orioko Arraun Elkarteak bi estropadetara eramango ditu ontziak asteburu honetan: batelen jardunaldia izango da bihar, martxoaren 6an, Trintxerpen; eta Euskadiko aulki mugikorreko Ligako 4. jardunaldia, berriz, Orion jokatuko da igandean.

Arratsaldeko 15:00etan hasiko da Trintxerpen Batelen Ligako 5. jardunaldiko estropada. Orioko Arraun elkarteak infantil, kadete A eta jubenil kategoriako emakumeak eta infantil A eta Bko gizonezkoak eramango ditu lehiara.

Aulki mugikorra

Hasiera batean Euskadiko Aulki Mugikorreko Ligako 4. jardunaldia Arabako Legution jokatzekoa bazen ere, arrauneko Federazioak ez du horretarako baimenik lortu eta hortaz, Orion izango da estropada. Irungo Santiagotarrak, Hondarribia, Ur-Kirolak, Donostiako Arraun Lagunak, Orio, Getxo eta Areetako Raspas elkarteek hartuko dute parte. 37 ontzitan banatutako jubenil eta senior kategoriako 113 arraunlari (gizonezkoak nahiz emakumezkoak) arituko dira lehian, 08:30ean hasita. 1.500 metro egin beharko dituzte guztiek arraunean.

9 ontzi aurkeztuko ditu Oriok: 8 jubeniletan (emakumezkoetan: skiffa, lemazain gabeko 4koa eta lemazaindun 4koa; gizonezkoetan: skiffa, lemazain gabeko 4ko bi ontzi, lemazaindun 4koa eta 8koa) eta bakarra seniorretan: zortzikoa.

Traineru jaitsiera

Aurreko asteburuan Oriako traineru jaitsiera bertan behera utzi ondoren (elkarteak aurtengo denboraldian estropada hori ez dela egingo erabaki du), Castron izango dira traineruak beren indarrak neurtzeko prest. Oriok, ordea, ez du parte hartuko.

11:00etan hasiko dute lehia izena eman duten 28 ontzik. 6050 metroko ibilbidea azkarren egiten duen ontziak ekarriko du etxera Castroko 13. Bandera.

Informatika ikastaroa langabetuentzat

Karkara — 2010-03-04T11:59:28Z

Martxoaren 18a baino lehen eman behar da izena Orioko udaletxean

Erakunde publikoek lnpostuei buruz eskaintzen dituzten informazio eta dokumentuak internet bidez egoki kudeatzeko helburuarekin, langabetuentzako Langabeziari aurre eginez, teknologia berrien bidez informatika ikastaroa antolatu dute Udaleko Ekintza Ekonomikoetako eta Enpleguko batzordeak eta Urola Kostako Udal Elkarteak. Astelehenetik ostiralera izango dira doako eskola horiek, egunean 2 orduz. Oraindik zehazteko dago goizez ala arrantsaldez izango diren.

Interesa dutenek Orioko udaletxean (943 83 03 46) eman beharko dute izena martxoaren 18a baino lehen. INEMeko txartelaren kopia aurkeztu beharko dute bertan.

Martxoan bi hitzaldi batzokian

Karkara — 2010-03-04T10:17:54Z

Luke Uribe-Etxeberria eta Joseba Agirretxea politikariak izango dira hizlariak

Euskadi Eraikitzen ekimenean barneratua dago EAJ alderdia eta Orioko Uri Batzarrak ere ekimen horren barruan hainbat hitzaldi antolatu ditu

Bihar, martxoaren 5ean, ostiralarekin, Luke Uribe-Etxeberria Legebiltzarkidea batzokian izango da Euskadiren bigarren transformazio ekonomikoari buruz hitz egiten, 19:30etik aurrera.

Martxoaren 25ean, berriz, Espainiako Diputatuen Kongresuko kide Joseba Agirretxeak Euskaldun bat Madrilen hitzaldia emango du.

Eturako eraikinen suteko argazkiak bildu ditugu Karkaran

Karkara — 2010-03-04T09:59:31Z

Gainerako albisteak, elkarrizketak, iritziak… ikusgai dituzue

Web gune honetan bertan argitaratu dugu, aspaldian bezala, Karkararen paperezko edizio berria (275. oraingoa) ostiralean etxez etxe postontzi guztietara banatu aurretik. Eturako eraikinen sutea ardatz nagusi hartuta, azalpenak eta zenbait irudi bildu ditugu lehen orrian aurrena, 10.ean eta 11.ean ondoren.

Ez da, ordea, jorratu dugun gai bakarra izan: Besteak beste, Orioko Arraun Elkarteko Joxe Kruz Exposito presidente berria, Ana Ibarguren, Errota jatetxeko jabea, eta Uxoa Zulaika, diseinatzailea, elkarrizketatu ditugu; aurrekontuen gorabeherak, Oria ibaiaren egungo egoera, hezkuntza kontuak, Zaharren Babes Lekukoen ibilerak eta asto probak ere han aurkituko dituzue; iritzien atalean, Joseba Oliden (Harmailatik), Eider Salegi (Adarretatik helduta), Onintza Aiestaran (Moila bazterretik), Pat Cowie (Nire honetan) eta Chris Fernandez (ikasleak idazle) dira protagonista; eta Ekiñe Saizarrek bertso afariko kritika egin digu eta Iñaki Iturainek bi alemaniarren istorioa ekarri du Oroimenaren kutxara.

Bestalde, galdera berri bat egin dizuegu inkestak atalean: Herriko zenbait leku publikotan, kiroldegian, esaterako, emakumezkoen aldageletan bakarrik dituzte haurrak aldatzeko baliabideak. Gizonezkoetan ere aitaren lanak egiteko bitartekoak jartzera derrigortu al behar dira toki publiko horiek?

Karkararen 275. zenbakia osorik irakurtzeko klikatu hemen.

Elhuyarren jokoak zozketatu ditugu

Karkara — 2010-03-03T13:34:48Z

Zoo zoroa eta Armix kart jokoetako bosna ale genituen Karkararen laguntzaileen artean zozketatzeko

Elhuyarren eskutik jaso ditugun informatika jokoak zozketatu genituen atzo, martxoaren 2an, izena eman zuten Karkaren laguntzaileen artean eta hauek dira irabazleak:

Zoo zoroa: Amaia Gutierrez Esnal, Joxemari Olasagasti Arruti, Miguel Berasaluze Erkizia, Dolores Aladaz Idarreta eta Miren Azkue Oliden.

Armix kart: Xabier Abarbia Etxeberria, Eneko Dorronsoro, Manoli Etxeberria, Eugenio Azkue eta Joakin Alberdi Sarasua.

Jokoa irabazi dutenek Karkararen bulegoan jaso behar dute, kultur etxeko lehen pisuan.

Emakumeen aldeko hainbat ekitaldi Orion

Karkara — 2010-03-03T09:16:43Z

Gaur hasiko dira ekitaldiak, emakumeen Mundu Martxari buruzko hitzaldi eta argazki erakusketa batekin

Martxoaren 8an Emakumeen Nazioarteko Eguna dela eta, hainbat ekitaldi antolatu ditu Urola Kostako koordinadora feministak. Horietako batzuk Orion izango dira.

Martxoaren 3an, asteazkenarekin, emakumeen Mundu Martxari buruzko hitzaldia eta argazki erakusketa izango dira, 20:00etan, kultur etxean, Emaginekoek eskutik.

Martxoaren 5ean, ostiralean, Agua con sal filma emango da kultur etxean, 22:00etan hasita, eta, ondoren filmean landutako gaiari buruzko hausnarketa egingo da.

Martxoaren 6an, larunbatarekin, autoekin karabana egingo da Oriotik hasi eta Azkoitiraino. 10:00etan da hitzordua, Antilla hondartzako aparkalekuan.

Martxoaren 8tik 13ra, Mundu Martxako furgoneta Euskal Herriko hainbat txokotatik pasako da eta 11n Zarautzen izango da. Martxoaren 13an, Iruñean emango zaio bukaera furgoneta horren Euskal Herriko ibilbideari eta autobusa antolatuko da Urola Kostako herrietatik.

Euskal Herriko Mus txapelketa jokatuko dute Esoainek eta Uzkudunek

Karkara — 2010-03-02T15:40:54Z

Irabazi ez arren, txapelketa txukuna egin zuten Gipuzkoakoa

Orioko kanporaketan nagusi izanda lortu zuten Ritxi Uzkudunek eta Ibai Esoainek Gipuzkoako mus txapelketan aritzeko txartela. Txapelketa hori otsailaren 27an eta 28an jokatu zen, Seguran, eta, irabazi ez arren, txapelketa txukuna egin zutenez, Euskal Herriko mus txapelketako final nagusian ere izango dira bi oriotarrak, martxoaren 20an, Seguran bertan.

Suak hartu ditu Eturako eraikinak

Karkara — 2010-03-02T10:55:25Z

16:30 aldera hasi da sutea eta langile bat zaurituta dago

Gaur, martxoaren 1ean, astelehenarekin, 16:30 aldera, sutea izan da Eturako eraikinetako Thalassa eta S.Q. Futur Quimica enpresetan. Ke beltzak eta garrek berehala hartu dute inguru guztia. Suhiltzaileak ahal bezain azkar hasi dira lanean sua menperatzeko, baina bertako enpresetan erabiltzen duten erregaia dela medio, ezin izan dute ezer egin eta bi eraikinak kiskalita geratu dira. Sutea leherketa batetik etorri da eta bertako langileetako bat, Jesus Arruti, Barakaldoko Gurutzetako ospitalera eraman behar izan dute leherketak eragindako erredurengatik. Aurpegia, eskuak, gerria eta hankak erreta ditu eta, hau idazteko momentuan, ez dakigu zenbateraino den larria haren egoera.