Aulki mugikorreko Gipuzkoako Ligako 6. jardunaldia jokatuko da larunbatean Orion. 14:00etan hasita, batak bestearen ondoan lerrokatuta jokatuko duten lehen estropada izango da, orain artekoak jaitsierak izan dira-eta.

Kategoria eta espezialitate guztietan arituko dira gizonezkoak nahiz emakumezkoak: bi arraunlari bina arraunekin (2x), biko ontzia arraun banarekin (2-), bakarka bi arraunekin (1x), laukotea arraun banarekin (4-), lauko ontzia bina arraunekin (4x) eta zortzikoa lemazainarekin (8+).

Estropada eremu berean bi luzera neurri izango dira. Infantilek eta beteranoek 1.000 metro egin beharko dituzte, Txanka paretik herriko zubiraino; eta kadeteek, jubenilek, eta seniorrek, berriz, 1.500 metro, Mariaerrotazahar paretik hasi eta zubiraino.

Oriotarrek 19 ontzirekin hartuko dute parte estropadan eta Hondarribia, Santiagotarrak, Ur-Kirolak eta Donostia  izango dituzte aurkari.