Beñat Carrera oriotarrak atxilotuta jarraitzen du, dirudienez, desordena publikoak eragitea leporatuta. Ertzaintzaren Deustuko komisaldegian eman du gaua eta Bizkaiko entzutegiko zeldatan dago, epaileak deklarazioa noiz hartuko zain. Gaztea atzo atxilotu zuen ertzaintzak, Bilbon. Ezker abertzaleak deitutako manifestazio saiakeraren ondoren izandako istiluetan parte hartu izana leporatu diote. Haren ingurukoek, ordea, oso bestelako bertsioa eman dute gertakariari buruz. Izan ere, erabat gezurtatu dute Carrerak istiluetan parte hartu izana eta gaineratu manifestaldian parte hartu besterik ez zuela egin.

Konzentrazioa plazan 
Atxiloketaren berria zabaldu bezain pronto, konzentrazio baterako deia egin zuen Orioko ezker abertzaleak, 19:30erako. Ordu horretarako hainbat lagun bildu ziren plazan, 150 antolatzaileen arabera, Atxiloketei stop. Beñat kalera zioen pankartaren azpian. Ertzaintzaren istiluen kontrako furgoneta bat agertu zen plazara. Ertzainen buruak konzentrazioa legez kanpokoa zela eta, arduradunen baten datuak eskuratu ezean, sakabanatzeko agindua eman zien bertan bildutakoei. Parte hartzaileek, asanbladan, konzentrazioa bertan behera utzi eta astelehen arratsaldean berriro biltzea erabaki zuten Independentzia aurrera, Euskal Herria kalera lemapean.