Ikastolako eta Zaragueta eskolako haurrek Eskola Agenda 21ko emaitzak udal ordezkariei aurkeztu zizkieten atzo goizean, 11:00etan hasita. Udaletxeko udalbatzar aretoan bildu ziren ikastetxeetako ordezkariak, irakasleak, ikasleak, Jon Redondo alkatea, Euskara, Hezkuntza eta Merkataritza batzorde buru Iñaki Iturain eta Leire Zinkunegi, Turismo eta Ingurumen batzorde burua. 

Ikastetxeetako azpiegituren eta ur kontsumoaren diagnosia, eta herriko ibaiaren, erreken eta iturrien egoera aztertu dituzte aurtengo ikasturte hasieratik haurrek. Atzoko udalbatzarrean ikertutakoaren berri emateaz gain, zenbait proposamen eta berek hartutako konpromisoak eman zituzten aditzera.

Herriko iturriak izan zituzten aztergai lehenik eta behin, eta zer hobetua bazela adierazi zuten. Ur emari desegokia dutela, botoiak haurrentzako aproposak ez direla, ura behar bezela ez dutela xurgatzen edota ur galerak dituztela salatu zuten, besteak beste. Arazoak konpontzeko proposamenak ere jarri zituzten mahai gainean.

Ibaiaren egoera izan zuten hizpide gero. Hondakinak, olioa, koipea eta ur zikinak jasotzen dituela adierazi zuten. Oriaren egoera hobetzeko neurriak hartzeko, neguan itsasoak hondartzetara ekarritako zaborrak sarriago garbitzeko eta ibaira doan ur guztia araztegietatik pasatzeko eskatu zioten Udalari. Altxerriko, Txankako eta Santioko errekei dagokienean, landare eta animalia inbaditzaileak desagertarazteko bidea jartzeko eta erreka guztiz ez tapatzeko eskatu zuten. Herritarrak uraren garrantziaz eta ibai eta errekak garbi mantentzeko kontzientziatzeko kanpainak burutzea ere egokitzat jo zuten haurrek.

Ikasleek, beren aldetik, egoera hobetzeko konpromisoak hartu zituzten, hala nola, uraren erabilpen egokia eginez ur-kontsumoa jaistea  eta ibaira zaborrik ez botatzea.

Redondo alkateak haurrek aurkeztutako arazoak zein enpresa edo erakunderi dagozkion azaldu zuen. Aiako erreken egoeraren berri emateko bertako Udalarekin harremanetan jartzeko konpromisoa hartu zuen. Ur kontsortzioaren gain dauden gaietan, berriz, arazoak Udalak eta enpresak elkarrekin landuko dituztela agindu zuen. Orioko Udalari dagozkionetan, plazaratutako problemak konpontzeko martxan jarriko direla adierazi zuen.

Udalbatzar berezia bukatuta, luntxa izan zuten ikasle, irakasle eta udal ordezkariek.