Orioko elkargoaren aurkezpena izan da gaur, eguerdiko 13:00etan, herriko plazan. Marian Urangak, elkargoaren izenean adierazi duenez, herritar guztien parte hartzeko eskubidea bermatzeko bildu dira zenbait eragile: Arkupe, ELA-Urola Kosta, Farfara, Harribil dantza taldea, Herrio natur taldea, LAB-Urola Kosta, OKK Gazte Asanblada, Orioko Pilota Elkartea, Talaimendi Mendi Elkartea, Txurrumuski Kultur Aisialdi Gazte Elkartea, Aralar, EAE-ANV eta Ezker Batua. Hala ere herritar, herriko eragile eta talde guztiek beren ateak irekita dituztela azpimarratu du.

Elkartea sortzeko bi arrazoi azpimarratu ditu Urangak: Muntoko Plan Partzialari buruzko informazioa herritarrei helaraztea eta herriaren hitza aintzat hartu eta errespetatzeko beharra.

Muntoko Planaren xehetasunak eman dira aditzera ondoren. Elkargoak babes ofizialeko etxebizitza gehiago eskatu ditu: Munton eraikitzea aurreikusten den etxebizitza kopurua legeak ezartzen duen gutxieneko portzentajea da, eta Udalaren borondatearen esku dago kopuru hori handitzea edo ez. Azterketa hidrografikoan, berriz, prozedura irregular asko gauzatu direla eta eragile ezberdinek helegiteak aurkeztu dituztela gehitu du Urangak. Gune komertzialaren beharrik ez dela ere adierazi du: tamainu horretako gune komertzialak herriko merkataritzarengan eragin zuzena izan dezake eta herriaren bizigarritasuna, giza harremanak eta herria beraren jasangarritasuna zalantzan jar dezake, besteak beste lanpostuen prekarietatea bultzatuz. Ikastolari dagokionean, egun duen eraikin berri baten premia ikusita, elkargoak eraikuntzaren garapenean inongo oztoporik ez duela izan nahi gehitu du.

Aurrera begira jarritako helburuen artean, Muntoko Plan Partzialaren bernegoziaketa berri bat bideratzea eta herri elkargoak etorkizunean herrian joka dezakeen paperaren garrantzia azpimarratzea nabarmendu ditu Urangak.

Bukatzeko, Herri Elkargoak OKK Gazte Asanbladako zazpi auzipetuei bere elkartasuna adierazi dio.