“Bizitza oraina biziz soilik gozatu dezakegu”
Donostiarra da jatorriz Yolanda Urreizti Aldalur yoga irakaslea, egun Orion bizi bada ere. Gustura dago Orion bere seme Aimarrekin, itsasoa, mendia eta ibaiaz inguraturik. Horrek naturarekin eta gure funtsarekin konektatzen laguntzen dio. Oso gustuko du, besteak beste, Itsasoan oinutsik ibiltzea, irakurtzea, mendira joatea, isiltasuna, bere buruarekin eta lagun on batekin egotea. Atzerrian hamaika urte igaro zituen Yolik. Minesotan, Estatu Batuetan, egin zituen heziketa fisikoko ikasketak. Entrenatzaile pertsonal gisa ere aritu zen. Han-hemenka haurtzaindegietan, gimnasio eta institutuetan lan egin zuen karrera amaitu artean. Yoga Zestoako SanaTana Dharma eskolan ikasi zuen. Eta jakin badakigu, yogako irakasleei izen berezia jartzen zaiela: Yolirena Durgaia da, hau da, barruko oztopo eta gatazka emozionalak gainditu eta berriro maitasunera gidatzen gaituen indarra.
Txikitan misiolaria izan nahi zuen Yolik, jendeari bizitza hobea lortzen laguntzeko. Reikia, yoga, dantza, meditazioa tarteko, Yoliren helburua mundu hobea egitea da. Eta ildo horretatik abiatuta, 2018. urtean Danha Yoga eskola sortu zuen. “Bizitzak eskaini didana berriro bizitzari bueltatzea nahi nuen, nire dohaiak eta zerbitzuak bere esku jarriz. Horregatik Dana Yogha eskola irekitzea erabaki nuen”.
Zer eskaintzen duzu zure ikastaroetan?
Batetik, banakako lana, couch baten antzerakoa. Gogoa kontrolatzeko tekniken bidez pertsona poliki-poliki gai da bere barrena askatzeko eta berak nahi duen bizitza sortzeko. Reikia ere eskaintzen det, Japoniatik etorritako reiki usui: bertan eskuak jartzen dizkiot pertsonari eta energía kanal bat bilakatzen naiz. Unibertsoko energiak tresna gisa erabiltzen nau eta ohatilan dagoen pertsonari bideratzen diot energía, hark oreka lortuz dezan fisikoki,mentalki, nahiz espiritualki. Eta, azkenik, yoga klaseak eskaintzen ditut. 10-15 minutuko solasaldiaren ostean, arnasketak lantzen ditugu, emozioak, pentsamenduak , gorputza eta nerbio sistema erlaxatuz, endorfinak edo zoriontasunaren hormonak sortuz. Ondoren asanak, luzaketakegiten ditugu. Eta azkenik, meditazio gidatu txiki bat eta erlaxazio goxo bat.
Zergatik hasten da jendea yoga praktikatzen?
Arrazoi desberdin asko daude: gorputza zaintzeko, osasuna zaintzeko, konzientzia garatzeko….
Zeintzu dira yogaren abantaila nagusiak?
Nor zaren konturatzen zara, zure mugak eta aurreiritziak ezagutzen zoaz eta egoeraren jabe egiten zara. Egoerak lasaiago eta harrremanak hobeto kudeatzen laguntzen dizu, barrua hausnartzen joaten zara, aurreiritzi horiek alde batera utziz, lasaiago biziz, barruko bakea lortuz, jendearekiko harremanak hobetuz, gustorago sentituz, maitasunarekin konektatuz. Benetan zu zaren hori erakusten duzu eta ez gurasoek edota gizarteak esan dizutena. Bizitzari begiratzeko era berri bat topatzen duzu, yogaren bitartez. Oso garrantzitsua da bizitzari gutariko bakoitzak dituen dohaiak eskeintzea zoriontsu izateko.
Yoga praktikatzea aholkatuko al zenuke?
Bai, denei aholkatuko nieke. Ikasle batzuk esan ohi didate yogarik gabe bizitza betarurreko beltz batzuekin begiratzen zutela. Yogak, aldiz, bizitza betaurreko distiratsu batzuekin begiratzen eta bizitzak ematen dizkizun opari guztiak eskertzen erakusten dizu. Zentzu berri bat ematen dio bizitzari.
Zergatik dago modan yoga?
Tristura bat dagoelako jendearen bihotzean eta hobeto, alaiago eta lasaiago bizitzen ikasi nahi dutelako. Yogak gauzei beste era batera begiratzen erakusten dizu , bizitzari emandakoa eskertuz eta bizitzaz gozatuz.
Nola lortzen duzu zure energía positiboa jendearengana iristea?
Nik egunero, minuturo, segundoro lantzen dut nire burua, nire alde guztiak begiratzen ditut, bai maitagarrienak eta baita nire mugak ere eta horiek maitatzen ikasten badut bakea aurkituz, nire energía maila igo egiten da, maitasuna eta bibrazio positiboak lortuz eta besteek hori nabaritzen dute. Beti lan honetan ari naiz, hau da, nire barrenak nola egiten duen lan ikertzen dut eta nola hitz egiten didan eta norabide positibo bat ipintzen diot,hots, bizitzak eskaintzen didan guztiaz konturatzea, eskertzea eta maitatzearena eta nik hori bizitzen badut, bada, besteei zabal diezaieket, batasuna eta elkarrulertzea zabalduz. Egunero, goizero ,nire burua lantzen dut, mantrak abestuz, ordubetez meditatuz. Bizitza oraina biziz soilik gozatu dezakegu. Eta nire buruari beti orainaz gozatzea gogorarazten diot.
Zer iritzi duzu inbidiari buruz?
Pertsonak inbidia duenean, ez du bere buruarengan sinisten, ez du bere gaitasunetan sinisten, ez da baloratzen. Baina inor ez da nor hori epaitzeko, beldurrak guztiongan baitaude.
Medikuaren tratamenduaz gain, zer neurri har ditzakegu, zure ustez, gaixotasun larriei aurre egiteko?
Minbizia eta gaixotasun gehienak gure pentsamendu toxikoen ondorio dira. Pentsamendu toxiko asko badituzu, gibela kexatu egingo da. Eta, behin pentsamendu ezezkor horiek trabatzen badira, minbizia ta horrelako gaixotasunak sor daitezke. Pentsamendu ezkor horiek bake eta maitasun pentsamenduetara berbideratu behar ditugu. Minbizia fisikoki elikagai egokien bitartez ere landu dezakegu eta emozionalki, arnasketa landuz , gure burua maitatzera eramaten gaituzten pentsamendu eta ariketen bitartez. Makrobiotika ere lagungarri izan daiteke.
Zerk haserrerazten zaitu gehienbat?
Lehen norbaitek gezurra esaten zidanean haserre sentitzen nintzen, baina orain bestearen tokian jartzen naiz eta neure buruari esaten diot pertsona horrek beldurra duela. Pentsamendu mota horiek eta arnasketen laguntzaz bakea lortzen dut.
Zein da zoriontasunaren gakoa, zure ustez?
Bizitza eskertzea, oraina bizitzea eta denak bat garela konturatzea; daukaguna eskertzea gauzak desiratu beharrean.
Etorkizunari begira proiekturik ba al duzu?
Ayurveda masajea ikasten ari naiz uneotan eta laster eskaintzeko prest egongo naiz.
Zer egiten duzu etxeratzen zarenean?
Abestu egien dut, mantra, meditazioak egiten ditut, gitarra jo, , nire seme Aimarri liburuak irakurri eta abar.
“Azkenik yoga probatzeko gonbitea egin nahi diet oriotar guztiei eta eskerrak eman nahi dizkiet Aimarrek eta nik jaso dugun harrera onagatik”, esan digu Yolik agurtu aurretik.