Gipuzkoako Foru Aldunditik jakinarazi dutenez, AP-8 errepidea itxita egongo da asteburu honetan Orio eta Zarautz artean, 34 eta 35 kilometro artean, Bilboko noranzkoan. Orioko lotunearen ondorengo bihurguneen segurtasuna hobetzeko lanak direla eta itxiko dute. Hori dela eta, gaur gaueko 22:00etatik igandeko 22:00etara, trafikoa Behobia norabideko galtzadan prestatutako pasabidetik desbideratuko da.
Orioko irteera irekita egongo da.
Obrak
34 eta 35 kilometro artean, maniobra "arriskutsuak" izaten direla azaldu du Gipuzkoako Foru Aldundiak. Izan ere, "gidari batzuk hirugarren erreia ia amaitu arte ez dute alboko erreira aldaketa egiten eta, batzuetan, ezusteko maniobrak egiten dituzte bihurgune betean eta abiadura handian". Egoera horiek ekidin nahi dituzte, eta horregatik jarri dute martxan obra. Hirugarren erreiaren amaiera 750 metrotan aurreratzea aurreikusten da, bihurguneen erradioak handituko dira eta trazadura leunduko da. Zorua ere berritu egingo da.