Emakumeak Zientzian programaren barruan, Euskal Herriko Unibertsitateko Kimika Fakultateko Berdintasun Batzordeak antolatutako Elkarrizketa Ezazu Emakume Zientzialari Bat lehiaketan parte hartu zuten Orioko Herri Ikastolako eta Zaragueta Herri Eskolako ikasleek, eta bi ikastetxeek aitortza jaso dute egindako lanagatik. Ostiralean egin zen Donostian sari banaketa ekitaldia eta bertan izan ziren ikasle oriotarrak
Alde batetik, Zaragueta Herri Eskolako Lehen Hezkuntzako 6. mailako ikasleek kazetaritza lanik onenaren saria jaso zuten, Lohitzune Solabarrieta ikerlariari eskolako irratirako egindako elkarrizketagatik. Orioko Herri Ikastolako ikasleek, berriz, Bideo Autonomo eta Pertsonalenaren saria; Edizio onenaren eta Bideo aldarrikatzaileenaren saria, eta sari sorpresa jaso zituzten. Azken hori berezia izan zen. Izan ere, Ikastolak hiru lan bidali zituen lehiaketara eta horietako bat ondo iritsi ez zenez, hasiera batean antolatzaileek ez zuten kontutan hartu. Dena dela, sari banaketa ekitaldian ezustekoa izan zuten ikasleek, eta sari sorpresa eman zieten egin zuten lana aitortzeko.