Orioko Udalak iragarri du merkataritza planaren lehen urratsa bukatu berri dela; diagnosiarena, hain justu ere. Hala, diagnosiaren datuak, ondorioak eta hausnarketak sektorearekin eta herritarrekin partekatzeko asmoz, saio ireki bat antolatu dute datorren astearterako. 14:30ean izango da, kultur etxean. Udalak herritarrak eta merkatariak gonbidatu ditu bertara.
Lehen fasean kontsumitzaileei eta sektoreari elkarrizketak eta inkestak egin zaizkie, herriko eskaria eta eskaintza aztertuz. Datu horiek talde bileretan kontrastatu dira ondoren eta, horrez gain, Orioko hirigintza analizatu da, merkataritza, zerbitzu enpresa eta ostalaritza ikuspegitik.
Dendartean Gipuzkoako Merkatarien Federazioa ari da egiten plana, eta helburu du herriko denden, zerbitzuen eta ostalaritza establezimenduen egoeraren diagnosia egitea, ekonomia zirkularra bultzatzeko. Diagnosiaren emaitza kontuan hartuta, hurrengo pausua izango da ekintza plan bat osatzea, sektorea indartzeko neurriak hartzeko.